Besimtarët e krishterë në Shqipëri festuan lindjen e Krishtit.

Në katedralen e Shën Palit, në Tiranë, besimtarët katolikë ishin mbledhur për meshën e mesnatës, kurse të krishterët ortodoksë do të luten në orët e para të paradites.

Me rastin e Krishtlindjeve, klerikët e lartë të krishterë kanë dhënë mesazhet e tyre, jo vetëm për besimtarët.

“Çdo njeri duhet të jetojë në paqe, në shtëpi e kudo, në Shqipëri e në botë.

Njerëzit duhet të hapin zemrën për paqe në këtë natë të rëndësishme”, u shpreh Imzot Anxhelo Masafra, raporton TCH.

Krishtlindja është një festë me orgjinë romake që festohet çdo vit në natën mes datës 24 dhe 25 dhjetor dhe përgjatë tërë datës 25.

Narrativa tradicionale e Krishtlindjeve, që përshkruhet në Testamentin e Ri, thotë se profecia parashikoi lindjen e Jezusit në një stallë në Betlehem, si biri i Jozefit dhe Marias.

Në fakt dita dhe muaji i lindjes së Krishtit nuk dihen, por rreth shekullit të katërt kisha perëndimore zgjodhi datën 25 dhjetor, si një simbolikë për të përkujtuar ardhjen e Zotit në tokë në formën e njeriut, për të shlyer mëkatet e njerëzve.

Gjithsesi sot festa e Krishtlindjeve është zhveshur shumë nga simbolika thjesht fetare dhe në shumë vende, përfshirë Shqipërinë që doli nga një periudhë e gjatë ateizmi shtetëror, Krishtlindja festohet nga të tërë dhe është ditë pushimi zyrtare, ku familjet bashkë mblidhen përreth një dreke festive, për të shkëmbyer dhurata.